Gengið þrjá og hálfan hring í kringum landið
Þökkum öllum þeim fjölmörgu sem tóku þátt í Styrkleikunum á Selfossi með okkur. Myndirnar sem hér fylgja segja allt um þá einstöku stemmingu og samhug sem einkenndi leikanna.
Fyrstu Styrkleikar Krabbameinsfélagsins fóru fram frá hádegi laugardaginn 30. apríl til hádegis á sunnudag 1. maí á Selfossi. Fyrir fram höfðu 16 lið skráð sig til leiks með hátt í 250 þátttakendum sem fjölgaði þegar á leið og voru hátt í 600 þátttakendur þegar viðburðinum lauk. Margir kíktu við þennan sólarhring, fylgdust með dagskránni og gengu nokkra hringi í leiðinni. Gera má ráð fyrir að hátt í 1000 manns hafi lagt leið sína í Íþróttahöllina á Selfossi á meðan á viðburðinum stóð.
https://www.youtube.com/watch?v=TZz4bbuKeaE
Styrkleikarnir ganga þannig fyrir sig að liðin skiptast á að halda boðhlaupskefli gangandi í heilan sólarhring. Hægt var að velja um þrjár vegalengdir og gaf hver vegalengd ákveðin fjölda smella á sérstökum teljurum sem þátttakendur notuðu til að telja þá hringi sem gengnir voru. Segja má að gangan hafi gengið afar vel því 19.812 hringir voru gengnir sem jafngildir 4.755 km. Til að setja þá vegalengd í samhengi var farið rúmlega þrjá og hálfan hring í kringum Ísland á þessum sólarhring. (Skv. Vegagerðinni er hringvegurinn (þjóðvegur númer 1) 1.321 km).
Hápunktur Styrkleikana var svo Ljósastundin þegar um 150 pokar sem þátttakendur og gestir höfðu skrifað á falleg minningar- og þakklætisorð var raðað upp í eitt stórt hjarta. Sandur hafði verið settur í botn pokana og sprittkerti ofan í sem kveikt var og ljósin í salnum slökkt sem skapaði einstaka upplifun. Samhliða var boðið upp á hugvekju og tónlistaratriði. Margir höfðu á orði að þessi fallega stund gleymist seint.
Sjáumst á næstu Styrkleikum!
- Myndir: Olga Björt Þórðardóttir.