Fyrsti karlakórinn skráður í Mottumars og fyrsti skokkhópurinn!
Mottukeppnin er í fullum gangi en hún snýr nú aftur eftir fimm ára hlé. Yfir 300 keppendur eru skráðir og þar á meðal eru skemmtilegir hópar. Þar má til dæmis finna Karlakór Hveragerðis og Skokkhóp Vals.
Það eru fáir hópar sem tengjast meiri bræðraböndum en karlakórar, sem eiga sér sterkar menningarlegar rætur á Íslandi. Karlakór Hveragerðis leitaði til Krabbameinsfélagsins og skráði sig til leiks í Mottukeppninni. Langar þá að safna fé til að styðja við fjölþætt starf sem snýr að krabbameinum í körlum. Enda þekkja þeir, eins og við öll, einhvern eða einhverja, sem hafa greinst með krabbamein.
Karlakórinn er ekki eini hópurinn sem kom skemmtilega á óvart. Skokkhópur Vals að Hlíðarenda hefur einnig skráð sig til leiks. Það er einstaklega ánægjulegt. Hreyfing á borð við skokk er frábær forvörn gegn krabbameinum. Heilsusamlegur lífsstíll og regluleg hreyfing geta nefnilega komið í veg fyrir fjögur af hverjum 10 krabbameinum.
Við bjóðum þessa hópa, sem og alla aðra, hjartanlega velkomna í Mottukeppnina!