Ég skil þig - vitundarvakning um jafningjastuðning
Í dag er Alþjóðlegi krabbameinsdagurinn. Af því tilefni beinir Krabbameinsfélagið sjónum að mikilvægi jafningjastuðnings og hrindir af stað í samvinnu við Kraft vitundarvakningunni „Ég skil þig“ þar sem stuðningsfulltrúar deila reynslu sinni.
Stuðningsnet Krabbameinsfélagsins og Krafts samanstendur af um það bil 100 stuðningsfulltrúum sem hafa mismunandi reynslu af því að greinast með krabbamein, eða að vera aðstandandi einhvers sem greinist. Þeir sem veita stuðninginn sækja námskeið og eru sjálfboðaliðar sem nýta reynslu sína til að miðla þekkingu til annarra og hlusta á þá sem leita eftir stuðningi.
„Ég skil þig“ herferðin fer að mestu fram á samfélagsmiðlum og á heimasíðum Krabbameinsfélagsins og Krafts. Næstu tvær vikur verða birtar sögur fólks sem hefur þegið og veitt jafningjastuðning í gegnum Stuðningsnetið. Markmiðið er að opna umræðuna og kynna Stuðningsnetið fyrir þeim sem gætu haft gagn af.
Hvar fær ég stuðning?
Ef þú hefur áhuga á að ræða við stuðningsfulltrúa getur þú haft samband í síma 866 9618 alla virka daga frá kl. 8:30 til 16:30. Þorri Snæbjörnsson sálfræðingur svarar beiðnum um jafningjastuðning. Einning er hægt að senda inn beiðni með því að smella á hlekkinn hér eða senda tölvupóst á thorri@krabb.is.
