Sigriður Sólan Guðlaugsdóttir 14. ágú. 2018

„Ég hleyp af því ég get það“

Krabbameinsfélagið hefur fengið að láni einkunnarorð Gunnars Ármannssonar í Reykjavíkurmaraþoninu, en í ár tekur Gunnar þátt í sjötta sinn.

Árið 2011 safnaði Gunnar áheitum fyrir Krabbameinsfélagið með því að hlaupa fimm maraþon til að halda upp á að fimm ár voru þá liðin frá því hann lauk krabbameinsmeðferð. Hann bjó sér til einkunnarorðin „Ég hleyp af því ég get það“ sem hann vonaði að myndu einnig hvetja aðra til að hlaupa fyrir félagið með sömu tilfinningu í brjósti. 

Einkunnarorð Gunnars verða afhent hlaupurum sem hlaupa til styrktar Krabbameinsfélaginu til að festa á hlaupaboli sína á Fit & Run sýningunni í Laugardalshöll fimmtudaginn 16. ágúst og föstudaginn 17. ágúst. 

Gunnar þekkir krabbamein betur en margir, en auk þess að glíma sjálfur við blóðkrabbamein, missti hann eiginkonu sína úr leghálskrabbameini árið 2014. Sögu sinni deilir hann á bloggsíðunni Garmur: „Árið 2014 lést eiginkona mín af völdum krabbameins á hlaupadeginum þegar 3 tímar og 28 mínútur voru liðnar frá því að hlaupið hófst. Það var um það bil sá tími sem ég hafði fyrirfram hugsað mér að hlaupa á ef ég hefði tekið þátt,“ segir hann á síðunni. Árið 2015 hljóp hann til minningar um eiginkonu sína til styrktar Krabbameinsfélaginu.

Í ár hleypur Gunnar til minningar um góðan hlaupavin sem er nýfallinn frá eftir baráttu við krabbamein. Undirbúningur fyrir hlaupið hefur hins vegar ekki gengið áfallalaust fyrir sig, því á tímabili leit út fyrir að hann þyrfti að nýju að hefja lyfjameðferð, sem ekki reyndist svo þörf á.

„Um leið og við þökkum Gunnari ómetanlegan stuðning á liðnum árum og leyfi fyrir notkun á einkunnarorðunum, óskum við honum alls hins besta bæði í hlaupinu og lífinu sjálfu. Saga hans getur verið okkur öllum innblástur,“ segir Halla Þorvaldsdóttir, framkvæmdastjóri Krabbameinsfélagsins.

Starfsfólk félagsins afhendir hlauprum hvatningarmiðana í Laugardalshöllinni kl 15-20 fimmtudaginn 16. ágúst og 14-19 föstudaginn 17. ágúst.

Ég hleyp af því að ég get það!


Fleiri nýjar fréttir

1. mar. 2024 : Við erum að kalla þig út, kall!

Við fögnum framförum í greiningu og meðferð en best er auðvitað ef hægt er að koma í veg fyrir krabbamein. Vísindin vísa okkur leiðina og rannsóknir sýna að 30 til 40% krabbameina tengjast lífsstíl. Það þýðir að ýmsar lífsvenjur, t.d. tóbaksnotkun, áfengisneysla, hreyfingarleysi, mataræði og fleiri þættir geta haft áhrif á líkurnar á ákveðnum tegundum krabbameina.

Lesa meira

29. feb. 2024 : Köllum kalla þessa lands út!

Mottumars, árlegt árvekni- og fjáröflunarátak tileinkað krabbameinum hjá körlum hefst í dag. Kallaútkall er yfirskrift átaksins í ár þar sem lögð er áhersla á forvarnargildi hreyfingar. Regluleg hreyfing dregur úr hættunni á krabbameinum, en allt of margir karlmenn hreyfa sig ekki nóg til að njóta þessara verndandi áhrifa. Það þarf ekki nema örfáar mínútur af hreyfingu á dag til að ná fram jákvæðum áhrifum.

Lesa meira

28. feb. 2024 : Upp með sokkana og í Mottumarshlaupið 2024

Komdu með í fyrsta Mottumarshlaup Krabbameinsfélagsins sem haldið verður á hlaupársdeginum 29. febrúar. Við lofum stuði og stemmningu um leið og við hreyfum okkur til stuðnings góðum málstað!

Lesa meira

27. feb. 2024 : Sjöunda árið í röð fær forsetinn fyrsta parið

Forseta Íslands, hr. Guðna Th. Jóhannessyni hefur frá árinu 2018 verið afhent fyrsta parið af Mottumarssokkunum sem seldir eru til styrktar Krabbameinsfélaginu í Mottumars, árlegu árvekni- og fjáröflunarátaki sem tileinkað er krabbameinum hjá körlum. Forsetinn hefur sýnt verkefninu ómetanlegan stuðning í gegnum árin.

Lesa meira

27. feb. 2024 : Mottumarssokkarnir hannaðir af AS WE GROW

Það eru þær Gréta Hlöðversdóttir, Snæfríð Þorsteins og Kamilla Henriau sem eru hugmyndasmiðirnir og hönnuðirnir á bakvið sokkana sem eru einstaklega fallegir. 

Lesa meira

Var efnið hjálplegt?