Bleika slaufan 2020: Áfram krabbameinsrannsóknir!
Nú þegar við kveðjum Bleikan október er efst í huga þakklæti til okkar frábæra stuðningsfólks. Fólk og fyrirtæki um allt land sýndu stuðning sinn og lögðu sitt af mörkum til að efla krabbameinsrannsóknir á Íslandi okkur öllum til heilla.
Guðbjörg Kristín Ingvarsdóttir, skartgripahönnuður og gullsmiður í Aurum, hannaði Bleiku slaufuna í ár og hefur haft veg og vanda af framleiðslu hennar líka. TVG-Zimsen flutti slaufuna til landsins og til um helmings sölustaða innanlands án endurgjalds. Danól dreifði slaufunni til um helmings sölustaða án endurgjalds. Á fjórða hundrað sölustaðir um land allt seldu Bleiku slaufuna án þóknunar til að allur ágóði gæti runnið beint til söfnunarinnar. Kunnum við öllum þessum aðilum okkar bestu þakkir. Sala í vefverslun félagsins tvöfaldaðist miðað við í fyrra. Sölu slaufunnar er lokið og sölutölur verða ljósar á næstu vikum.
Við kynntum átakið í upphafi með málþingi umkrabbameinsrannsóknir þar sem kynntar voru nokkrar af þeim rannsóknum sem Krabbameinsfélagið vinnur að þessi misserin, auk rannsókna sem hafa fengið styrki úr Vísindasjóði félagsins .
Tugir fyrirtækja hafa auglýst vörur sem styrkja Bleiku slaufuna og veita þannig okkur öllum enn fjölbreyttari möguleika á að styrkja rannsóknarstarf samhliða innkaupum. Þessi stuðningur er veruleg viðbót við söfnunarfé og skiptir miklu máli.
Fjöldi einstaklinga og fyrirtækja tók sig saman og safnaði fé til rannsókna. Má þar nefna Eggert Unnar sem safnaði 1,3 milljónum króna með streymi á Twitch, hóp myndlistarfólks í Gallerý Grásteini sem safnaði 540.000 krónum með sýningunni Brjóst, Vélsmiðjuna Héðinn, sem hét á starfsfólk sitt á Bleika daginn og styrkti átakið um 820.000 krónur. Svo mætti lengi telja.
Um þúsund manns fylgdust með streymi af Bleiku málþingi þar sem fjallað var um áskoranir og bjargráð í tengslum við Covid-19 og krabbamein kvenna.
Covid-19 stoppaði ekki Bleika daginn þó vissulega hefðu sóttvarnir áhrif. Bleiki dagurinn var haldinn um allt land, á vinnustöðum, á heimilum og í skólum og leikskólum með teikningum, föndri, lýsingu, veitingum og bleikum klæðnaði. Við fengum sendar myndir víða að og útvarpsstöðinK100 varð Bleikt100 .
Ágóði söfnunar Bleiku slaufunnar rennur til krabbameinsrannsókna en ný þekking skiptir öllu máli svo við getum fækkað þeim sem þurfa að takast á við krabbamein, fjölgað þeim sem lifa af og bætt lífsgæði þeirra. Allt starf félagsins byggir á stuðningi almennings og beinum fjárframlögum.
Kæru Íslendingar. Innilegar þakkir fyrir stuðninginn. Hann skiptir öllu máli.