Arion banki og Vörður styðja Krabbameinsfélagið
Arion banki og Vörður styrktu Krabbameinsfélagið um 2.178.000 króna sem eru bæði styrkur frá félögunum og afrakstur söfnunar frá kvennakvöldi sem haldið var í höfuðstöðvum félaganna. Krabbameinsfélagið þakkar kærlega fyrir stuðninginn sem skiptir svo sannarlega máli.
Kvennakvöldið sem Arion banki og Vörður stóðu fyrir var haldið í tilefni af bleikum október til styrktar Bleiku slaufunni og Krabbameinsfélaginu. Viðburðurinn gekk vel og hlýddu gestir á áhugaverð erindi frá Arion banka og Krabbameinsfélaginu og glöddust saman. Það er óhætt að segja að Borgartúnið hafi sjaldan verið bleikara en þetta kvöld.