Alþjóðlegi HPV dagurinn er í dag
Krabbamein er ekki smitsjúkdómur. Aftur á móti geta vissar sýkingar aukið líkur á krabbameinum. Það er helst sýking með HPV-veirunni sem veldur krabbameinum á Íslandi. HPV-bólusetning og leghálsskimun draga stórlega úr áhættunni.
Þó að nærri fimmtungur allra krabbameina í heiminum sé af völdum sýkla, eru flestir þeirra afar sjaldgæfir á Íslandi og valda fáum krabbameinum. Það er helst sýking með HPV-veirunni (human papillomavirus) sem veldur krabbameinum á Íslandi. Á síðustu árum hafa að meðaltali 18 konur á ári fengið leghálskrabbamein, sem talið er að orsakist í 99% tilfella af HPV-smiti. Með HPV-bólusetningu, sem er hluti af almennum bólusetningum stúlkna í 7. bekk, dregur verulega úr hættunni á leghálskrabbameini. En þar sem bólusetningin veitir ekki fullkomna vörn ættu bólusettar konur samt sem áður að þiggja boð í leghálsskimun sem hefst við 23 ára aldur.
Alþjóðlegi HPV dagurinn er tileinkaður aukinni vitneskju um HPV og hvatningu um að þiggja bólusetningu og boð í leghálsskimun.
Hér má nálgast algengar spurningar um HPV-veiruna og svör við þeim.