Alþjóðadagur gegn krabbameinum #1 Forvarnir
Þann 4. febrúar er alþjóðadagur gegn krabbameinum. Tilgangur dagsins er að hvetja til umbóta og eflingar á sviði forvarna, greiningar og meðferða gegn krabbameinum. Slagorð dagsins er „Ég er... og ég ætla...“ þar sem hverjum fyrir sig gefst færi á að lýsa sinni leið í baráttunni gegn krabbameinum.
Það er ekki hægt að segja til um hvers vegna einstaklingar fá krabbamein. Hins vegar er vitað að hægt er að koma í veg fyrir 30-50% krabbameina með heilbrigðum lífsháttum.
Stærstu þættirnir eru að:
- forðast tóbak, áfengi og að brenna í sólinni eða ljósabekkjum
- hreyfa sig reglulega
- borða hollt og fjölbreytt í hæfilegu magni
- reyna að halda þyngdaraukningu í skefjum
- stúlkur þiggi boð í HPV-bólusetningu og konur þiggi boð í skimun
Sjá fleiri leiðir til að minnka líkur á krabbameinum.
Það þarf ekki að gera allt 100% rétt til að hafa áhrif og því ættu allir að geta tekið skref í rétta átt.
Ég er foreldri og ég ætla að vera góð fyrirmynd fyrir börnin mín. Hvað ætlar þú að gera?
Hér eru nokkrar hugmyndir fyrir þig:
- „Ég er xxx og ég ætla að sleppa áfengi um helgina.“
- „Ég er xxx og ég ætla að fara í göngutúr eftir vinnu.“
- „Ég er xxx og ég ætla að fá mér auka skammt af grænmeti með kvöldmatnum.“
- „Ég er xxx og ég ætla að klappa mér á bakið því það eru 20 ár síðan ég hætti að reykja.“
