Almannaheill 10 ára: Fagmennska og trúverðugleiki félagasamtaka
Á þessu ári halda Almannaheill - samtök þriðja geirans uppá 10 ára afmæli sitt.
Í tilefni afmælisins ritaði Ketill Berg Magnússon, formaður Almannaheilla, neðangreinda grein og birtist hún í Morgunblaðinu í morgun.
Á þessu ári halda Almannaheill - samtök þriðja geirans uppá 10 ára afmæli sitt. Að því tilefni er vert að staldra við og spyrja til hvers við þurfum slík samtök.
Félagasamtök á Íslandi sem starfa í almannaþágu bæta samfélagið okkar á margan hátt. Almannaheillafélög vinna að því að auðga líf fólks, dýra eða vernda náttúruna án hagnaðarsjónarmiða. Í þessum félögum starfa sjálfboðaliðar sem vinna á óeigingjarnan hátt árið um kring. Slíkt sjálfboðastarf er reyndar mannræktandi í sjálfu sér og hafa fjölmargar rannsóknir sýnt að þátttaka í sjálfboðaverkefnum eykur lífsgæði sjálfboðaliðanna sjálfra.
Almannaheillafélög í landinu eru fjölmörg og eru samtals með tugiþúsunda félagsmanna sem þjóna margfalt fleirum. Almannaheill eru samstarfsvettvangur þessara félaga og sjálfseignarstofnana á Íslandi sem vinna að almannaheill án hagnaðarsjónarmiða. Marmiðið er að stuðla að fagmennsku og trúverðugleika slíkra félaga og bæta starfsskilyrði þeirra. Almannaheill er vettvangur þar sem félagasamtök læra hvert af öðru og þar sem færi gefst til að eiga samtal og stilla af kúrsinn miðað við breyttar áherslur í heiminum og alþjóðlega viðtekin gildi. Dæmi um verkefni Almannaheilla eru siðareglur fyrir félagasamtök, tillögur að heildarlögum um almannaheillafélög, nám fyrir stjórnendur félagasamtaka, Lýsa (áður Fundur fólksins), árleg lýðræðishátíð. Nýverið gerðu Almannaheill samning við yfirvöld um að kynna Heimsmarkmið Sameinuðu þjóðanna fyrir íslenskum félagasamtökum.
Þegar við, almenningur, fyrirtæki og yfirvöld, styðjum félagasamtök til góðra verka viljum við geta treyst þeim. Við viljum að fólkið eða málefnið sem félagasamtökin starfa fyrir njóti faglegrar hjálpar, að félagasamtökin taki vandaðar ákvarðanir, fari vel með fjármagn og komi í veg fyrir hagsmunaárekstra. Við viljum ekki að fjármálaóreiða eða eiginhagsmunapot i félagasamtökunum skaði málstaðinn sem við styðjum. Því miður er alltaf hætta á að það gerist í félagasamtökum eins og annars staðar þar sem peningar og hagsmunir eru í húfi. Gæðastarf og stuðningur við félagsamtök eru því mikils virði.
Á afmælishátíð Almannaheilla í dag 7. nóvember afhendir forsetinn viðurkenninguna Fyrirmynd 2018 einum félagasamtökum til almannaheilla sem starfa af fagmennsku og skipuleggja starfsemi sína með gagnsæi, skilvirkni með góða þjónustu og siðferði að leiðarljósi.
Framtíð félaga til almannaheilla á Íslandi er björt. Fleiri og fleiri einstaklingar vilja taka þátt í starfsemi félaga sem hafa ríkan tilgang fyrir samfélagið. Almannaheill mun halda áfram að styðja við slík félög og hjálpa þeim að starfa af fagmennsku og trúverðugleika.
Ketill Berg Magnússon Formaður Almannaheilla, samtaka þriðja geirans (Grein þessi birtist fyrst í Morgunblaðinu 7. nóv 2018)
