Áfengi getur valdið krabbameinum - Viðtal á Hringbraut
Vitað er að aukið aðgengi að áfengi er þvert á hagsmuni lýðheilsu þjóðarinnar og að það verður til að fjölga krabbameinstilfellum. Krabbameinsfélagið hefur gefið út yfirlýsingu þar sem þingmönnum er gefið „gula spjaldið“ vegna áfengisfrumvarpsins svokallaða.
Þetta var umræðuefni þeirra Sigmundar Ernis Rúnarssonar, þáttarstjórnanda þáttarins Tuttuguogeinn á Hringbraut, og Laufeyjar Tryggvadóttur, framkvæmdastjóra Krabbameinsskrár.
Þar kom meðal annars fram að tengsl áfengis og krabbameina hafa verið þekkt í um þrjá áratugi en Laufey telur að vegna þess hve áfengi er mikill hluti af menningu þjóðarinnar vilji fólk ekki heyra það. Til dæmis eru tengsl brjóstakrabbameins við áfengi og krabbamein í ristli og endaþarmi vel þekkt.
Í tengslum við þá mýtu að eitt glas á dag sé hjartastyrkjandi, benti Laufey á nýlega stóra rannsókn sem birtist í læknatímaritinu Lancet, þar sem sterklega kom fram að enginn lágmarksskammtur af áfengi sé hlutlaus eða hollur. Áfengisneysla byrjar strax að hafa áhrif og veldur 3 milljónum dauðsfalla á heimsvísu á ári. Ekki þurfi að hætta að smakka áfengi að hennar sögn, en aldrei að fá sér glas til að bæta heilsuna. Það sé bágbilja sem hafi verið hrakin. Ekki sé þó vinsælt að vera boðberi þessara frétta.
Aukið aðgengi eykur krabbameinstilfelli
Afleiðingar aukins aðgengis að áfengi hafa verið margrannsakaðar og hafa áhrif til fjölgunar krabbameinstilfella. Alþjóðaheilbrigðisstofnunin leggur áherslu á að dregið sé úr áfengisneyslu til að bæta heilsufar þjóða. Stofnunin telur langáhrifaríkustu aðferðirnar til að minnka áfengisneyslu vera í höndum stjórnvalda; verðstýring, aðgangstakmörkun og auglýsingabann.
Íslendingar drekka minna en hinar Norðurlandaþjóðirnar en Danir drekka mest, sem marka má af tölum um heilsufar þjóðarinnar. Vínandi í áfengi er krabbameinsvaldurinn. Því meira magn, því meiri áhætta, en etanól og niðurbrotsefni þess eru staðfestir krabbameinsvaldar og geta meðal annars valdið stökkbreytingum, sem aftur valda krabbameinum.
Áfengistengd dauðsföll myndu aukast
Umræða um að leyfa einnig sölu á áfengi í sérverslunum er ekki ný af nálinni. Sú umræða hefur farið fram í Svíþjóð og niðurstaðan var sú að áfengistengd dauðsföll vegna krabbameina myndu aukast um 18 prósent ef salan færi fram í sérverslunum, enn meira ef hún færi einnig fram í almennum verslunum. Þessi skilaboð þurfi að komast til skila til fulltrúa okkar á Alþingi sem hafa nú til meðferðar frumvarp til laga um breytingu á lögum um verslun með áfengi og tóbak.
Áfengi veldur 5% af öllum brjóstakrabbameinum á Norðurlöndunum og 3% af krabbameinum í ristli og endaþarmi.
Ofsadrykkja er að minnka, sem er af hinu góða. En að fá sér einn á hverjum degi er ekki gott fyrir heilsuna að mati Laufeyjar.
