70 ár fyrir 70 andlit - Bjarni Bjarnason
Bjarni Bjarnason læknir var formaður Krabbameinsfélags Íslands frá 1966 til 1973 en hafði áður verið varaformaður þess síðan 1960. Hann var í stjórn Krabbameinsfélags Reykjavíkur frá 1951 og formaður frá 1960 til 1965.
Á sjöunda áratug tuttugustu aldar stofnaði Bjarni á annan tug krabbameinsfélaga á landsbyggðinni sem voru forsenda þess að hægt væri að bjóða upp á leitarstarfsemi þar. Oft vakti hann athygli á skaðsemi sígarettureykinga, bæði í Fréttabréfi um heilbrigðismál, sem hann ritstýrði í áratug, og í útvarpserindum sem var vitnað til, meðal annars á Alþingi. Hann var fulltrúi Krabbameinsfélagsins í fyrstu Samstarfsnefnd um reykingavarnir.
Bjarni Bjarnason er eitt af 70 andlitum Krabbameinsfélagsins á afmælisárinu 2021-2022. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit
