70 andlit fyrir 70 ára - Ragnheiður Haraldsdóttir
Ragnheiður Haraldsdóttir hjúkrunarfræðingur var forstjóri Krabbameinsfélagsins á árunum 2010 til 2015. Hún var afar framsýn og á hennar starfstíma var unnin hnitmiðuð stefnumótun fyrir félagið auk þess sem mjög stór framfaraverkefni voru ýmist undirbúin eða framkvæmd. Má þar nefna íslenska krabbameinsáætlun, sem Ragnheiður var mikill talsmaður fyrir.
Heilbrigðisráðherra tilkynnti á 60 ára afmæli félagsins, árið 2011 að gerð yrði krabbameinsáætlun fyrir Ísland. Verkið sóttist seint en undir forystu Ragnheiðar lagði Krabbameinsfélagið mikla vinnu auk fjármuna í áætlunina. Heilbrigðisráðherra samþykkti loks tillögur að krabbameinsáætlun til 2020 í upphafi árs 2019 og framlengdi gildistíma hennar til 2030.
Á starfstíma Ragnheiðar var líka unnið að undirbúningi innleiðingar skimunar fyrir krabbameini í ristli og endaþarmi og m.a. gengið frá samstarfssamningi við tryggingafélagið Okkar líf. Formlegur undirbúningur verkefnisins hófst á árinu 2016. Á starfstíma Ragnheiðar var einnig gengið frá samkomulagi Krabbameinsfélagsins og Landspítala um að spítalinn sinnti klínískum brjóstaskoðunum, sem leiddi til þess að Landspítalinn tók alfarið við þeim skoðunum frá 1. janúar 2017. Ragnheiður vann unnið að uppbyggingu Vísindasjóðs félagsins, sem var stofnaður í lok árs 2015. Vísindasjóðurinn hefur reynst bylting í krabbameinsrannsóknum á Íslandi.
Eftir að Ragnheiður lét af starfi forstjóra var hún formaður stjórnar Nordic Cancer Union út árið 2017 og leiddi starf sambandsins með miklum sóma. Þó Ragnheiður sé ekki lengur starfsmaður Krabbameinsfélagsins brennur hún fyrir málstað félagsins. Hún var kjörin í heiðursráð félagsins árið 2018 en gegnir einnig formannshlutverki í Vísindasjóði félagsins, sem hún kom á í sinni forstjóratíð.
Ragnheiður Haraldsdóttir er eitt af 70 andlitum Krabbameinsfélagsins á afmælisárinu 2021-2022. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit