70 andlit fyrir 70 ár - Valgerður Sigurðardóttir
Valgerður Sigurðardóttir læknir fagnar 70 ára afmæli sínu í dag og óskum við henni innilega til hamingju með daginn. Valgerður hefur verið formaður Krabbameinsfélags Íslands frá árinu 2017 og á langa sögu með Krabbameinsfélaginu, bæði sem sjálfboðaliði og starfsmaður.
Valgerður starfaði lengi á Leitarstöðinni við klínískar greiningar á brjóstakrabbameini og einnig í Heimahlynningu Krabbameinsfélagsins þar til hún tók við stöðu yfirlæknis líknardeildar Landspítala.
Valgerður Sigurðardóttir læknir hefur verið formaður Krabbameinsfélags Íslands frá árinu 2017. Valgerður á langa sögu með Krabbameinsfélaginu, bæði sem sjálfboðaliði og starfsmaður. Hún starfaði lengi á Leitarstöðinni við klínískar greiningar á brjóstakrabbameini og einnig í Heimahlynningu Krabbameinsfélagsins þar til hún tók við stöðu yfirlæknis líknardeildar Landspítala. Valgerður er mjög sterkur fagmaður sem missir aldrei sjónar á því mannlega. Lífsgæði sjúklinga með alvarlega illkynja sjúkdóma og þjónusta við mikið veika og deyjandi einstaklinga hafa verið Valgerði hjartans mál alla tíð. Í þeim málum hefur Valgerður verið óstöðvandi baráttukona og hefur tekist með góðu samstarfi og óendanlegri seiglu að umbylta líknarþjónustu hér á landi. Oft var mótbyr en nú er líknarþjónusta löngu viðurkennd bæði í heilbrigðiskerfinu og hjá almenningi. Valgerður brennur fyrir málstað Krabbameinsfélagsins og tryggir að hjartað sé alltaf á réttum stað.
Valgerður Sigurðardóttir er eitt af 70 andlitum Krabbameinsfélagsins á afmælisárinu 2021-2022. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit