70 andlit fyrir 70 ár – Þorsteinn Pálsson
Þorsteinn segir Krabbameinsfélagið fyrst og fremst hafa verið að þrýsta á um að hér yrði heilbrigðisþjónusta sem tæki á þessum alvarlega sjúkdómi með öllu því afli sem ein þjóð getur gert og telur engan vafa á því að félagið hefur áorkað mjög miklu í þeim efnum.
Þorsteinn Pálsson segist lengst af hafa verið titlaður blaðamaður í símaskránni. Hann er fyrrverandi ráðherra og situr í stjórn Krabbameinsfélagsins. Hann segir að þegar leitað hafi verið til hans þá hafi hann litið svo á að hann eins og svo margir hafi verið í skuld við félagið og einfaldasta leiðin til að borga hana hefði verið að segja já þegar hann var beðinn um að gera smá viðvik.
Krabbamein hefur snert hann og hoggið í raðir fjölskyldu hans eins og í flestum fjölskyldum.
Þorsteinn segir Krabbameinsfélagið fyrst og fremst hafa verið að þrýsta á um að hér yrði heilbrigðisþjónusta sem tæki á þessum alvarlega sjúkdómi með öllu því afli sem ein þjóð getur gert og telur engan vafa á því að félagið hefur áorkað mjög miklu í þeim efnum.
Þorsteinn bendir á að lögð hafi verið mikil vinna síðustu ár við að byggja upp Vísindasjóð sem veitir tugmiljóna á hverju ári í styrki til krabbameinsrannsókna. Fjölmörg verkefni blasa við sem félagið þarf að takast á við.
„Auðvitað veit fólk misjafnlega mikið um starf Krabbameinsfélagsins en ég held að það sé enginn vafi að það sé mikill velvilji og góður hugur hvarvetna í garð félagsins. Þess vegna hefur því tekist að afla fjármuna til þess að sinna þessu umfangsmikla og fjölbreytta starfi, það gerist ekki nema af því að fólkið í landinu hefur skilning“.
Þorsteinn Pálsson er eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit
Framleiðsla: Egill & Jakob.
