70 andlit fyrir 70 ár - Snorri Ingimarsson
Snorri Ingimarsson læknir var fyrsti forstjóri Krabbameinsfélagsins og gegndi starfinu frá 1984 - 1988. Snorri var mjög áhugasamur um krabbamein og krabbameinsfræði og lét sig mjög varða málefni þeirra sem greinast með krabbamein, bæði hér á landi og á alþjóðavettvangi.
Lífsgæði fólks með krabbamein voru honum hugleikin og í þeirri umfjöllun var hann einn af frumkvöðlunum hér á landi. Fyrir hans tilstuðlan var Heimahlynning Krabbameinsfélagsins, líknarþjónusta í heimahúsum, stofnuð. Snorri var afar öflugur liðsmaður Krabbameinsfélagsins og aðildarfélaga þess og starfaði með þeim í áratugi, meðal annars í stjórn Krabbameinsfélagsins á árunum 1999 til 2001. Snorri var kjörinn í heiðursráð félagsins árið 2012. Hann var ávallt skammt undan og til hans var alltaf gott að leita. Snorri lést árið 2019, 71 árs að aldri.
Snorri Ingimarsson er eitt af 70 andlitum Krabbameinsfélagsins á afmælisárinu 2021-2022. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit
