70 andlit fyrir 70 ár - Sigurður Yngvi Kristinsson
Sigurður Yngvi Kristinsson er prófessor í blóðsjúkdómum við Háskóla Íslands. Hann hefur leitt rannsóknarverkefnið Blóðskimun til bjargar - sem hefur átt samastað í húsakynnum Krabbameinsfélagsins og fengið dyggilegan stuðning úr Vísindasjóði félagsins.
Krabbameinsfélaginu er hjartans mál að styðja frumkvöðlastarf sem getur bjargað mannslífum. Sigurður Yngi Kristinsson er prófessor í blóðsjúkdómum við Læknadeild Háskóla Íslands. Hann minnir okkur á að þótt manneskja greinist með krabbamein, er hún enn sama manneskjan – sjúkdómar eiga ekki að skilgreina okkur, við erum enn sama fólkið og áður.
Sigurður hefur leitt rannsóknarverkefnið Blóðskimun til bjargar sem er samstarfsverkefni Háskóla Íslands, Landspítalans og Krabbameinsfélagsins. Þar er skimað fyrir forstigum mergæxlis, sem er í dag ólæknandi sjúkdómur. Rannsóknin er einstök á heimsvísu og þá ekki síst vegna þátttöku almennings sem hefur farið fram úr björtustu vonum. Blóðskimun til bjargar á sér samastað hjá Krabbameinsfélaginu, sem hefur einnig lagt til ríflega styrki til rannsóknarinnar. Allt þetta hefur verið mögulegt með frjálsum framlögum, stuðningi frá íslenskum almenningi og fyrirtækjum til Krabbameinsfélagsins.
Sigurður Yngvi Kristinsson er eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Við hvetjum fólk til að fylgjast með á instagram og facebook, myllumerkið er #70andlit