70 andlit fyrir 70 ár - Guðbjartur Hannesson
Alþjóðlegi krabbameinsdagurinn 4. febrúar 2011 var merkisdagur. Þá tilkynnti Guðbjartur Hannesson, velferðarráðherra á árunum 2011 til 2013, að hann hygðist láta vinna krabbameinsáætlun fyrir Ísland. Ákvörðunina tengdi hann 60 ára afmæli Krabbameinsfélagsins.
Félagið fagnaði ákvörðuninni enda hafði gerð og innleiðing krabbameinsáætlunar verið mikið baráttumál félagsins. Því miður sóttist verkefnið hægt og tillögur að íslenskri krabbameinsáætlun til ársins 2020 lágu ekki fyrir fyrr en í júlí 2017. Krabbameinsfélagið hafði þá ásamt fjölda sérfræðinga lagt mikla vinnu auk fjármuna í áætlunina. Í upphafi árs 2019 samþykkti Svandís Svavarsdóttir tillögurnar en framlengdi gildistímann til 2030. Áhrif áætlunarinnar eru því miður enn lítt sjáanleg en vonir Krabbameinsfélagsins eru að breyting verði þar á.
Guðbjartur Hannesson lést úr krabbameini langt fyrir aldur fram þann 23. október 2015.
Guðbjartur Hannesson er eitt af 70 andlitum Krabbameinsfélagsins á afmælisárinu 2021-2022. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit
