69 milljón króna fjárfesting í framförum
Vísindasjóður Krabbameinsfélagsins veitir 69 milljónum króna til 11 rannsókna árið 2020. Úthlutun ársins var kynnt á aðalfundi félagsins þann 6. júní.
Úthlutað var úr sjóðnum í fjórða sinn og nam heildarupphæð styrkja rúmlega 69 milljónum króna. Alls bárust 27 umsóknir um styrk úr sjóðnum. Eftir umfjöllun Vísindaráðs Krabbameinsfélagsins valdi stjórn Vísindasjóðs 11 rannsóknir sem hlutu styrki að upphæð frá 1,8 milljónir upp í 10 milljónir króna.
Markmið sjóðsins er að efla íslenskar rannsóknir á krabbameinum með því að styrkja árlega með fjárframlögum rannsóknir á orsökum krabbameina, forvörnum, meðferð og lífsgæðum sjúklinga.
Vísindasjóðurinn var stofnaður í desember 2015 með framlögum frá Krabbameinsfélaginu og aðildarfélögum þess. Auk þess rann minningarsjóður Ingibjargar Guðjónsdóttur Johnson og sjóður Kristínar Björnsdóttur inn í sjóðinn. Formaður sjóðsstjórnar er Sigríður Gunnarsdóttir, framkvæmdastjóri hjúkrunar á Landspítala og prófessor.
Krabbameinsfélagið óskar styrkhöfum innilega til hamingju.
Upplýsingar um allar rannsóknirnar 30 sem hafa hlotið styrki úr sjóðnum frá fyrstu úthlutun vorið 2017, krabbameinsrannsóknir almennt, Vísindasjóðinn og umsóknarferlið má finna á nýuppfærðri heimasíðu Vísindasjóðs.
