Anna Lára Magnúsdóttir er 47 ára og greindist fyrir sjö árum með brjóstakrabbamein. Henni fannst jafningjastuðningurinn veita sér von um að hún fengi gamla lífið sitt til baka. 

Anna María greindist 34. ára með Non-Hodgkins eitilfrumukrabbamein en gaf sér ekki tíma til að hitta stuðningsfulltrúa. Hún sér eftir því í dag og telur mikilvægt að þiggja jafningjastuðning.

Haukur Gunnarsson er sjötugur og greindist með krabbamein í blöðruhálskirtli fyrir þremur árum. Hann og kona hans hafa sótt stuðning í Ráðgjafarþjónustu Krabbameinsfélagsins sem hefur auðveldað þeim að tala saman um veikindin og áskoranirnar sem þeim fylgja. 

Ragnheiður Guðmundsdóttir er 37 ára og greindist með krabbamein í lífhimnu og lifur fyrir ári síðan. Kvíði, áfallastreita og þunglyndi fylgdu veikindunum og hún vill hjálpa öðrum með stuðningi í Stuðningsnetinu.

Ása Nishanti Magnúsdóttir er 34 ára og greindist með eitlakrabbamein fyrir fimm árum. Hún hefur misst báða foreldra sína úr krabbameini.

Gísli Álfgeirsson er 39 ára en á síðasta ári lést eiginkona hans eftir sex ára baráttu við brjóstakrabbamein. Saman eiga þau þrjú börn og Gísla finnst mikilvægt að styðja við barnafjölskyldur.

Ingibjörg Þorgerður Þorleifsdóttir er 65 ára. Hún hefur tvívegis greinst með lungnakrabbamein, fyrst 50 ára og svo 64 ára. Hún ákvað að gerast stuðningsfulltrúi og veita stuðning sem hana vantaði í sínu ferli.

Nílsína Larsen Einarsdóttir greindist með eitlakrabbamein fyrir níu árum, þá 32 ára. Hún hafði reynslu af því að vera aðstandandi, en pabbi hennar greindist með krabbamein í hálsi þegar hún var tvítug.

Guðmundur G. Hauksson er 65 ára. Hann greindist fyrir 11 árum með krabbamein í blöðruhálskirtli og upplifði margar erfiðar hugsanir í tengslum við greiningu og meðferð, sér í lagi þegar taka þurfti ákvarðanir varðandi möguleika í meðferð.

Sandra Dögg Eggertsdóttir greindist fyrir fimm árum, þá 18 ára, með Ewing Sarcome beinkrabbamein í viðbeini. Jafningjastuðningur hjálpaði henni og auðveldaði ferlið.

Salvör Sæmundsdóttir er 29 ára og var einungis 17 ára þegar hún missti systur sína úr krabbameini. Hún segir mikið álag að vera aðstandandi og að systkini verði gjarnan útundan í ferlinu.