Evrópska krabbameinsvikan 2021: Áfengi og krabbamein – það sem allir ættu að vita
Nú stendur yfir krabbameinsvika evrópskra krabbameinsfélaga (European week against cancer). Þá vekja evrópsk krabbameinsfélög athygli á ýmsum þáttum sem skipta máli í því marghliða verkefni sem krabbamein er.
Í ár er meðal annars lögð áhersla á að auka þekkingu almennings á tengslunum milli áfengisdrykkju og aukinnar hættu á krabbameinum.
Áfengi er staðfestur krabbameinsvaldur samkvæmt Alþjóðakrabbameinsrannsóknarstofnuninni (IARC).
Áfengisneysla tengist auknum líkum á sjö tegundum krabbameina, m.a. brjóstakrabbameini og krabbameini í ristli og endaþarmi sem eru meðal algengustu krabbameina.
Mikilvægt er að fólk þekki þessi tengsl svo það geti tekið upplýstar ákvarðanir varðandi áfengisdrykkju, svo sem að sleppa henni eða takmarka.
Ekki skiptir máli af hvaða tagi drykkurinn er; bjór, léttvín, sterkt vín eða annað, heldur hvert sjálft áfengismagnið er.
Hættan á krabbameinum helst í hendur við það magn sem drukkið er.
Því minna, því betra.
Ýmsir aðrir lífsstílsþættir hafa áhrif á líkurnar á því að fólk fái krabbamein. Hægt er að koma í veg fyrir 4 af hverjum 10 krabbameinum með heilbrigðum lífsstíl sem felst m.a. í að nota ekki tóbak, stunda reglulega hreyfingu, borða hollan mat í hæfilegu magni, sporna gegn ofþyngd og varast útfjólubláa geisla sólar og ljósabekkja.
Gagnlegt efni:
- Nánar um 12 leiðir til að draga úr líkum á krabbameinum, ráðleggingar frá WHO og Evrópsku krabbameinssamtökunum (ECL).
- Áfengisneysla tengist auknum líkum á sjö tegundum krabbameina.
- Krabbameinsvika evrópskra krabbameinsfélaga.
