Áskorun

Við undirrituð styðjum áskorun Krabbameinsfélags Íslands á yfirvöld um að þau beiti sér fyrir forvörnum gegn krabbameinum sem felast meðal annars í hvatningu um heilbrigða lífshætti. Mikilvægt er að yfirvöld sýni frumkvæði og stuðli þannig að því að færri greinist með krabbamein, samfélaginu öllu til hagsbóta.

Lífstílsbreytingar á síðustu árum og áratugum hafa orðið til þess að fleiri eiga á hættu að greinast með krabbamein. Reykingar, óhollt mataræði og kyrrseta eru meðal helstu áhættuþátta.

Áskorunin er eftirfarandi:

Krabbameinsfélagið skorar á sveitarstjórnarfólk að gefa lýðheilsu meira vægi og efla forvarnir gegn krabbameinum með því að:

banna reykingar á opinberum svæðum sveitarfélaga
hvetja til betri nýtingar útisvæða sem ætluð eru til hreyfingar og útivistar
hvetja til frekari hreyfingar hjá grunnskólabörnum með því að gefa hreyfingu meira vægi í skólastarfi
bjóða upp á hollan mat í leik- og grunnskólum
auðvelda einstaklingum sem búa við þröngan efnahag að stunda fjölbreytta hreyfingu

Krabbameinsfélagið skorar einnig á þingheim og ríkisstjórn að beita sér fyrir bættri lýðheilsu meðal annars með því að:

halda áfram þeirri vinnu sem hafin var við krabbameinsáætlun og ljúka henni hið fyrsta
hefja skimun fyrir ristilkrabbameini
banna reykingar á almannafæri
koma á skýrri stefnu og aðgerðaáætlun í tóbaksvörnum og setja lög um rafrettur
tryggja að áfengisauglýsingar verði áfram bannaðar og koma í veg fyrir duldar áfengisauglýsingar

Krabbameinsfélagið hefur kallað eftir upplýsingum um stefnu framboðanna varðandi forvarnir gegn krabbameinum og lýðheilsumál. Þau svör sem hafa borist má lesa hér.

Undirskrift