Tilgangur samtakanna er að stuðla að velferð fólks sem greinst hefur og hyggst félagið ná með því að
• vinna að hagsmunum þeirra sem greinst hafa með sjúkdóminn og kynningu á málefnum þeirra.
• stuðla að fræðslustarfsemi og miðlun upplýsinga til sjúklinga, aðstandenda, annarra velunnara og almennings í samstarfi við krabbameinsfélögin og aðra.
• efla samstarf við heilbrigðisstarfsfólk, heilbrigðisstofnanir, sem og önnur félagasamtök sem láta sig varða heilbrigði og velferð þeirra er greinast með sjúkdóminn.
• hvetja til rannsókna á sjúkdómnum og orsökum hans.
• stofna til samskipta við sambærileg samtök erlendis.
• beita sér fyrir því að hafin verði leit að ristil- og endaþarmskrabbameini á byrjunarstigi.
 
Nýgengi ristilkrabbameins hefur aukist mikið hérlendis á undanförnum áratugum. Þrefalt fleiri slík tilfelli greinast hjá körlum og tvöfalt fleiri hjá konum en fyrir fimmtíu árum. Þannig greinast nú á jafnaði 134 einstaklingar á ári með krabbamein í ristli og endaþarmi. Þetta er önnur algengasta dánarorsök af völdum krabbameins og einungis 55-60% sjúklinganna lifa í fimm ár eftir að að hafa greinst með sjúkdóminn. Um 900 manns eru nú á lífi hérlendis eftir að hafa greinst með krabbamein í ristli eða endaþarmi.

Á Íslandi hefur verið rætt um það í fjórðung aldar eða svo hvort hefja eigi skimun fyrir krabbameini í ristli og endaþarmi. Á árunum 1986-1988 var gerð forkönnun á fýsileika þess að skima með því að leita eftir blóði í hægðum. Landlæknir gaf svo út klínískar leiðbeiningar um skimun árið 2002. Þar er ráðlögð skimun með leit að blóði í hægðum á hverju ári hjá einstaklingum 50 ára og eldri og einnig hjá öllum sem eru í aukinni áhættu vegna ættarsögu og annarra sjúkdóma svo sem ristilbólga. Þessar leiðbeiningar landlæknis eru enn í gildi en þrátt fyrir það hefur ekki verið sköpuð formleg umgjörð um skimun hér á landi.
Íslendingar hafa náð einna bestum árangri sem um getur í veröldinni við meðferð brjóstakrabbameina og lífslíkur þeirra sem greinast með sjúkdóminn hafa aukist stórlega á undanförnum áratugum. Þannig má nú ætla að 86% sjúklinga lifi í fimm ár eftir að brjóstakrabbamein greinist. Sennilega má rekja þann árangur til skimunar fyrir brjóstakrabbameinum, sterkra sjúklingasamtaka, upplýstrar umræðu í samfélaginu um sjúkdóminn og öflugrar heilbrigðisþjónustu yfirleitt. Þeir sem standa að stofnun nýju samtakanna telja að með skimun megi ná sambærilegum árangri varðandi krabbamein í ristli og endaþarmi.